عبدالعلیم خان نے افواج پاکستان سے اظہار یکجہتی اور چیف آف ڈیفنس فورسز اور فیلڈ مارشل حافظ سید عاصم منیر کو خراج تحسین پیش کرتے ہوئے کہا ہے کہ قوم 10 مئی کے دن بھارت کا حملہ اور پاک فوج کا شاندار جواب نہیں بھولی ،کسی کو شک میں نہیں رہنا چاہیے ہندو لالہ، دشمن آج بھی ہمارا الگ وجود تسلیم نہیں کرتا، ہم دشمن کو ایک آنکھ نہیں بھاتے لیکن آج پاک فوج کے باعث دشمن کو آنکھیں اونچا کر کے دیکھ سکتے ہیں.
وفاقی وزیر نے کہا کہ اپنی عورتوں کو بیوہ اور بچوں کو یتیم کرنا آسان کام نہیں، سوشل میڈیا پر بکواس کرنے والے اپنے بچوں کو بارڈر پر بھیجیں،شہداء کے والدین اور بچوں پر کیا بیتتی ہے، پراپیگنڈا کرنے والوں کوشرم آنی چاہیے۔
اتوار کو عبدالعلیم خان نے اپنے خطاب میں کہا کہ 10 مئی کو دشمن کیسے بھاگا ساری دنیا نے دیکھا، آج تک نہیں ہوا کہ دشمن کے 7 جہاز گرائیں ہوں اور ہمارا ایک بھی نہیں گرا، یہ اللہ تعالیٰ کے کرم سے ہماری پاک فوج کے جوانوں کا کارنامہ تھا،عبدالعلیم خان نے مزید کہا کہ آج پاک فوج کے باعث دنیا بھر میں پاکستان کا تشخص تبدیل ہو چکا ہے، ہر پاکستانی سر اٹھا کر چل سکتا ہے،اللہ تعالٰی کے کرم سے ہمارے سینے پاک فوج نے چوڑے کئیے، صدر استحکام پاکستان پارٹی عبدالعلیم خان نے دو ٹوک انداز میں کہا کہ ملک کے خلاف بکواس کرنے والوں کی زبانیں کھینچ لینی چاہئے،ہم حکومت میں رہیں نہ رہیں، اس ملک کی سلامتی کے لئے دعا گو ہیں، انہوں نے عوام سے وعدہ لیا کہ وہ پاک فوج کے خلاف ہرزہ سرائی کرنے والے غداروں کو کبھی ووٹ نہیں دینگے۔
فیصل آباد میں استحکام پاکستان پارٹی کے کنونشن میں وفاقی وزیر عبدالعلیم خان نے نئے صوبوں کی تجویز پیش کرتے ہوئے کہا کہ پنجاب کو 4 حصوں میں تقسیم کرکے مغربی پنجاب کا ہیڈکوارٹر فیصل آباد میں ہونا چاہیے اورصرف پنجاب نہیں چاروں صوبوں کو انتظامی بنیادوں پر تقسیم کریں، عبدالعلیم خان نے کہا کہ امریکہ کی آبادی34 کروڑ اور 50 صوبے، روس کی آبادی 14کروڑ اور 85 صوبے،آذربائیجان کی صرف سوا کروڑ عوام کے لئے 60 صوبے اور ہمارے ہمسائے میں افغانستان کی4کروڑآبادی کے لئے 34 صوبے ہیں اسی طرح مصر کی ایک کروڑ آبادی میں 27 صوبے، ترکی کی ساڑھے 8 کروڑ کے لئی81 صوبے، جاپان کی سوا کروڑ کے لئے 47 صوبے اور ایران کی ساڑھے 8کروڑ عوام کے لئے 31 صوبے ہیں، عبدالعلیم خان نے کہا کہ چاروں صوبوں کے وزراء اعلیٰ سے اپیل کریں گے کہ لوگوں کی مشکلات کم کریں کیونکہ ہم صرف عوام کی مشکلات کم کرنا چاہتے ہیں۔
وفاقی وزیر مواصلات عبدالعلیم خان نے فیصل آباد کے عوام کے لئے پنڈی بھٹیاں سے فیصل آباد کی 2 رویہ شاہراہ کو 3 رویہ کرنے اور فیصل آباد گٹ والاسے لاہور تک کی شاہراہ کی تعمیر کا اعلان کیا، انہوں نے سابق صوبائی وزیر اور استحکام پاکستان پارٹی ویسٹ کے صدر چوہدری ظہیر الدین خان کی خدمات کو سراہتے ہوئے اپنے ہر ممکن تعاون کا یقین دلایا، اس موقع پر سابق ایم پی اے اختر علی چوہدری اور فیصل آباد کی قیادت نے عبدالعلیم خان اور ان کے وفد کا شاندار استقبال کیا.
صدر پنجاب رانا نذیر احمد خان، مرکزی جنرل سیکرٹری میاں خالد محمود، مرکزی سیکرٹری اطلاعات سید صمصام علی بخاری، جنرل سیکرٹری پنجاب و ایم پی اے شعیب صدیقی، سابق ایم پی اے ہارون اکرم گل اور شہریوں کی بڑی تعداد موجود تھی جنھوں نے پاک فوج اور سپہ سالار فیلڈ مارشل کے حق میں زبردست نعرے بازی کی اور آتش بازی کا مظاہرہ کرتے ہوئے ڈھول کی تھاپ پر رقص کرتے رہے۔
