راولپنڈی: سابق وزیراعظم عمران خان سے ان کی اہلیہ بشریٰ بی بی کی ملاقات کروا دی گئی، جو سینٹرل جیل راولپنڈی میں عمل میں آئی۔
جیل ذرائع کے مطابق منگل کے روز عمران خان اور بشریٰ بی بی کی ملاقات جیل میں کروائی گئی، جس دوران دونوں میاں بیوی تقریباً 45 منٹ تک ایک دوسرے کے ساتھ رہے۔ ذرائع کا کہنا ہے کہ ملاقات کے دوران دونوں نے ایک دوسرے کا حال احوال دریافت کیا اور نجی گفتگو کی۔
جیل حکام کے مطابق گزشتہ منگل کو بھی عمران خان اور بشریٰ بی بی کی ملاقات کروائی گئی تھی، تاہم اس دوران جیل سے باہر سے کسی عزیز، رشتہ دار یا سیاسی رہنما کو ان دونوں سے ملاقات کی اجازت نہیں دی گئی۔
جیل ذرائع کا کہنا ہے کہ ملاقات جیل قواعد و ضوابط کے مطابق کروائی گئی اور سکیورٹی کے سخت انتظامات کیے گئے تھے۔
