جی سیون ممالک نے ایران میں جاری جنگ کے دوران شہری آبادی اور بنیادی ڈھانچوں پر ہونے والے حملوں کو فوری طور پر روکنے کا مطالبہ کیا ہے۔
جی سیون ممالک کے وزرائے خارجہ کا اجلاس پیرس میں منعقد ہوا، جس میں سعودی عرب، برازیل، جنوبی کوریا، بھارت اور یوکرین نے بھی شرکت کی، جہاں خطے کی صورتحال پر تفصیلی غور کیا گیا۔
اجلاس کے مشترکہ اعلامیے میں اس بات پر زور دیا گیا کہ علاقائی شراکت داروں، شہری آبادیوں اور اہم انفرا اسٹرکچر پر تنازع کے منفی اثرات کو کم کرنا انتہائی ضروری ہے، تاکہ انسانی نقصان اور معاشی مسائل کو روکا جا سکے۔
جی سیون ممالک نے واضح طور پر مطالبہ کیا کہ ایران میں جاری جنگ کے دوران شہریوں اور بنیادی ڈھانچوں کو نشانہ بنانے کا سلسلہ فوری طور پر بند کیا جائے، تاکہ صورتحال مزید خراب ہونے سے بچائی جا سکے۔
اجلاس میں اس بات کا بھی اعادہ کیا گیا کہ آبنائے ہرمز میں جہاز رانی کی محفوظ اور بلا معاوضہ آزادی کو بحال رکھنا نہایت اہم ہے، تاکہ عالمی تجارت اور توانائی کی ترسیل میں کسی قسم کی رکاوٹ پیدا نہ ہو۔
