وزیراعظم شہباز شریف نے کہا ہے کہ پاکستان سعودی عرب کی خودمختاری، سلامتی اور اسلام کے مقدس ترین مقامات کے تحفظ کے لیے مملکت کے ساتھ کھڑا ہے۔
وزیراعظم شہباز شریف نے سعودی عرب کے قومی دن کے موقع پر مبارکباد دیتے ہوئے کہا کہ سعودی عرب کی ترقی اور خوشحالی پاکستان کے لیے بھی باعثِ فخر ہے۔ پاکستان کو سعودی عرب کے ساتھ اپنی تاریخی، دیرینہ اور آزمودہ برادرانہ وابستگی پر فخر ہے۔
انہوں نے کہا کہ ولی عہد محمد بن سلمان کی قیادت میں پاکستان اور سعودی عرب کے برادرانہ تعلقات مزید مضبوط اور جامع اسٹریٹجک شراکت داری میں تبدیل ہو رہے ہیں۔ یہ شراکت داری امن و سلامتی کے فروغ اور امتِ مسلمہ کے اتحاد کے لیے دونوں ممالک کی مشترکہ وابستگی پر قائم ہے۔
وزیراعظم کا کہنا تھا کہ سعودی عرب کے خلاف حوثیوں کے حالیہ حملوں، بالخصوص مقدس شہر مکہ مکرمہ پر ڈرون حملے کی قابلِ مذمت کوشش کی پاکستان سخت ترین الفاظ میں مذمت کرتا ہے۔ حرمین شریفین کی حرمت، تقدس اور سلامتی کو لاحق کوئی بھی خطرہ دنیا بھر کے مسلمانوں کے جذبات کو شدید مجروح کرتا ہے۔
شہباز شریف نے مزید کہا کہ پاکستان اور سعودی عرب نے اپنے عزم کے تحت اسٹریٹجک باہمی دفاعی معاہدے اور مکہ مشترکہ دفاعی معاہدے پر دستخط کیے ہیں۔ پاکستان سعودی عرب کی خودمختاری، سلامتی اور اسلام کے مقدس ترین مقامات کے تحفظ کے لیے مملکت کے ساتھ کھڑا ہے۔
