چیئرمین پیپلز پارٹی بلاول بھٹو نے کہا ہے کہ بزرگوں سے اپیل کرتا ہوں کہ ایسے فیصلے لیں جس سے ادارہ مضبوط ہو، پارلیمان کے ممبران کی تقریر کو لائیو چلنا چاہیے، محمود اچکزئی کے گھر پر چھاپے کی مذمت کرتا ہوں۔
قومی اسمبلی کے اجلاس سے خطاب کرتے ہوئے انہوں نے کہا کہ اپنے خاندان کا تیسری نسل کا نمائندہ ہوں جو منتخب ہوا ہوں۔ پارلیمنٹ کا سنگ بنیاد ذوالفقار علی بھٹو نے رکھا تھا، میں اس کا نواسا ہوں جس نے پھانسی قبول کی لیکن اپنے اصولوں پو سودا نہیں کیا۔
سابق وزیر خارجہ نے کہا کہ جو لوگ یہاں احتجاج کر رہے ہیں انہیں پچھلے 6 ماہ سے آئین یاد آرہا ہے، وہ لیکچر دینا چاہیں تو ایک دوسرے کو دیں ہمیں نہ دیں۔ اگر یہ ہم سے آئین اور جمہوریت پر بات کریں گے تو میں اتنا کہوں گا کہ ‘ہو دا ہیل آر یو’؟
چیئرمین پیپلز پارٹی نے مزید کہا کہ حکومت چیف جسٹس قاضی فائز عیسیٰ سے درخواست کرے کہ وہ اپنی سربراہی میں جوڈیشل کمیشن قائم کریں تاکہ دودھ کا دودھ اور پانی کا پانی ہو سکے۔
