خصوصی احتساب عدالت نے بانی پی ٹی آئی عمران خان اور ان کی اہلیہ بشریٰ بی بی کے خلاف 190ملین پاؤنڈ ریفرنس کا ٹرائل مکمل کرنے پر فیصلہ محفوظ کرلیا۔
اڈیالہ جیل میں سابق وزیراعظم عمران خان اور بشریٰ بی بی کے خلاف 190ملین پاؤنڈ ریفرنس کی سماعت جج ناصر جاوید رانا نے کی ،وکیل صفائی کے دلائل مکمل ہونے کے بعد فیصلہ محفوظ کرلیا گیا ۔
ٹرائل کی آخری سماعت تقریبا 8 گھنٹے 15 منٹ تک جاری رہی اور اس دوران سابق وزیراعظم عمران خان اور ان کی اہلیہ بشریٰ بی بی عدالت میں پیش ہوئے. 190 ملین پاؤنڈ ریفرنس میں گزشتہ سال 27 فروری کو فرد جرم عائد کی گئی تھی،احتساب عدالت 23دسمبر سوموار کو فیصلہ سنائے گی۔
واضح رہے کہ ایک روز قبل نیب کے وکیل نے 190 ملین پاؤنڈ ریفرنس میں اپنے دلائل مکمل کرلیے تھے ۔ 190 ملین پاؤنڈ ریفرنس کا ٹرائل ایک سال میں مکمل ہوا اور نیب نے ٹرائل کے دوران 35 گواہان کے بیانات ریکارڈ کرائے ،عمران خان کے وکلا نے گواہان پر جرح کی۔ 190 ملین پاؤنڈ ریفرنس میں اہم گواہان سابق پرنسپل سیکرٹری اعظم خان، سابق وزیراعلی پرویزخٹک، سابق وفاقی وزیر زبیدہ جلال نے بھی بیان ریکارڈ کروایا۔
