فنانس بل 2024-25 میں کی گئی ترمیم کے تحت انکم ٹیکس کی شق میں اہم تبدیلی کرتے ہوئے قیمتی جائیداد، گاڑی یا دیگر اثاثوں کی خریداری کے لیے ایف بی آر سے اہلیت کا سرٹیفکیٹ حاصل کرنا لازمی قرار دے دیا گیا ہے۔
ترمیم کے مطابق، مخصوص مالیت سے زائد جائیداد یا گاڑی خریدنے کے خواہشمند افراد کو ایف بی آر کی ویب سائٹ پر اپنے کوائف کا اندراج کرنا ہوگا، جس کے بعد اہلیت کا سرٹیفکیٹ جاری کیا جائے گا۔ یہ شرط اس بات کو یقینی بنانے کے لیے رکھی گئی ہے کہ خریدار قانونی طور پر مطلوبہ مالی ذرائع رکھتے ہوں۔
تاہم، ترمیم شدہ قانون کے تحت 70 لاکھ روپے تک کی گاڑی، 5 کروڑ روپے تک کی رہائشی جائیداد، اور 10 کروڑ روپے تک کے کمرشل پلاٹ کی خریداری کے لیے ایف بی آر کا سرٹیفکیٹ لازمی نہیں ہوگا۔ ان حدود سے تجاوز کرنے والی خریداری کے لیے سرٹیفکیٹ حاصل کرنا لازم ہو گا۔
اسی فنانس بل کے تحت یکم جولائی سے جائیداد کی فروخت پر عائد ود ہولڈنگ ٹیکس کی شرح میں بھی نمایاں اضافہ کر دیا گیا ہے۔ نئی ترمیم کے مطابق، اب 5 کروڑ روپے تک کی جائیداد فروخت کرنے پر ود ہولڈنگ ٹیکس کی شرح 3 فیصد سے بڑھا کر 4.5 فیصد کر دی گئی ہے۔ اسی طرح اگر جائیداد کی مالیت 5 کروڑ سے 10 کروڑ روپے کے درمیان ہے تو اس پر ود ہولڈنگ ٹیکس 5 فیصد لاگو ہوگا۔ جبکہ 10 کروڑ روپے سے زائد مالیت کی جائیداد کی فروخت پر یہ شرح مزید بڑھا کر 5.5 فیصد مقرر کی گئی ہے۔ حکومت کا کہنا ہے کہ یہ اقدام مالیاتی نظم و ضبط کو بہتر بنانے اور ٹیکس نیٹ کو وسعت دینے کے لیے کیا گیا ہے تاکہ جائیداد کی خرید و فروخت کے عمل کو مزید شفاف بنایا جا سکے۔
دوسری جانب، پراپرٹی کی خریداری پر عائد ود ہولڈنگ ٹیکس میں 1.5 فیصد کمی کی گئی ہے، تاکہ خریداروں کو کچھ ریلیف دیا جا سکے۔
یہ اقدامات حکومت کی جانب سے ٹیکس نظام میں شفافیت، اثاثہ جات کی رجسٹریشن، اور آمدنی کے ذرائع کی تصدیق کو یقینی بنانے کی کوششوں کا حصہ ہیں۔
