امریکی صدر ڈونلڈ ٹرمپ نے کہا ہے کہ ایران کے ساتھ رابطے جاری ہیں اور ان کے خیال میں موجودہ جنگ جلد ختم ہو جائے گی، جبکہ آبنائے ہرمز بھی دوبارہ مکمل طور پر کھول دی جائے گی۔
واشنگٹن میں صحافیوں سے گفتگو کرتے ہوئے ڈونلڈ ٹرمپ نے عالمی اور امریکی توانائی کی قیمتوں کے حوالے سے بات کرتے ہوئے کہا کہ انہیں یقین ہے کہ ایران کے خلاف جاری تنازع زیادہ عرصے تک برقرار نہیں رہے گا۔
ان کا کہنا تھا کہ ایرانی قیادت زیادہ دیر تک جنگ جاری رکھنے کی پوزیشن میں نہیں ہے اور جلد ہی صورت حال میں بہتری آ جائے گی۔
صدر ٹرمپ نے اپنے سوشل میڈیا پلیٹ فارم ٹروتھ سوشل پر وزیرِ دفاع پیٹ ہیگسیتھ کی کارکردگی کی تعریف بھی کی اور کہا کہ وہ ان کے کام سے مطمئن ہیں۔
انہوں نے ایران کے خلاف فوجی کارروائیوں کا دفاع کرتے ہوئے دعویٰ کیا کہ ان اقدامات کا مقصد ایران کو جوہری ہتھیار حاصل کرنے سے روکنا ہے اور اس مقصد کے لیے ایرانی تنصیبات کو شدید نقصان پہنچایا گیا ہے۔
دوسری جانب ایران عمان کی ثالثی میں مذاکراتی عمل میں شریک ہے، جہاں آبنائے ہرمز سے تجارتی جہازوں کی محفوظ آمدورفت کے لیے مختلف تجاویز پر غور کیا جا رہا ہے۔
تاہم ایرانی حکام متعدد مرتبہ یہ واضح کر چکے ہیں کہ امریکا کے ساتھ کسی مستقل امن معاہدے کے لیے فی الحال براہِ راست مذاکرات نہیں ہو رہے۔
امریکی اور ایرانی حکام کے بیانات کے باعث خطے کی صورت حال بدستور غیر یقینی صورت اختیار کیے ہوئے ہے۔
