کراچی: قومی ائیرلائن نے لاہور سے لندن کے لیے فضائی آپریشن شروع کرنے کا اعلان کر دیا ہے، جس کے تحت چھ سال کے طویل وقفے کے بعد اس اہم بین الاقوامی روٹ پر پروازوں کا دوبارہ آغاز کیا جا رہا ہے۔
قومی ائیرلائن کے ترجمان کے مطابق پہلی پرواز پی کے 757، 30 مارچ کو لاہور سے لندن روانہ ہوگی، جبکہ لاہور سے لندن جانے والی تمام پروازیں لندن کے ہیتھرو ائیرپورٹ کے ٹرمینل 4 پر لینڈ کریں گی۔ ترجمان نے بتایا کہ لندن قومی ائیرلائن کے نیٹ ورک کے ابتدائی اور اہم بین الاقوامی روٹس میں شامل رہا ہے، اس لیے اس روٹ کی بحالی کو ایک اہم پیش رفت قرار دیا جا رہا ہے۔
ترجمان کا کہنا ہے کہ لاہور سے لندن کے لیے پروازوں کی بحالی کے بعد برطانیہ کے لیے قومی ائیرلائن کی ہفتہ وار پروازوں کی تعداد بڑھ کر 7 ہو جائے گی، جس سے مسافروں کو بہتر سفری سہولیات میسر آئیں گی۔ انہوں نے مزید بتایا کہ پابندی سے قبل قومی ائیرلائن پاکستان سے لندن کے لیے ہفتہ وار 10 پروازیں آپریٹ کر رہی تھی اور مستقبل میں لندن کے لیے پروازوں میں مرحلہ وار اضافہ کیا جائے گا۔
ترجمان کے مطابق قومی ائیرلائن اس سے قبل اسلام آباد سے لندن کے لیے ہفتہ وار تین پروازوں کا اعلان بھی کر چکی ہے، جو 29 مارچ سے شروع ہوں گی۔ ان اقدامات کا مقصد برطانیہ جانے والے مسافروں کے لیے سفری سہولیات میں بہتری لانا اور قومی ائیرلائن کے بین الاقوامی نیٹ ورک کو مزید مضبوط بنانا ہے۔
