لندن میں بھارتی وزیر خارجہ ایس جے شنکر پر حملہ کرنے کی کوشش کی گئی جس کی ویڈیوز بھی سوشل میڈیا پر زیر گردش ہیں۔
بھارتی میڈیا رپورٹس کے مطابق خالصتانی مظاہرین کے ایک گروپ کی جانب سے بھارتی وزیر خارجہ ایس جے شنکر پر حملہ کرنے کی کوشش کی گئی۔
رپورٹ کے مطابق خالصتان تحریک کے مظاہرین لندن کے چٹھم ہاؤس کے باہر احتجاج کر رہے تھے جہاں جے شنکر موجود تھے۔
بھارتی میڈیا کا کہنا ہے کہ گروپ میں سے ایک شخص جے شنکر کی گاڑی کی جانب بھاگا اور پھر پولیس افسران کے سامنے بھارتی پرچم پھاڑ دیا جس کے بعد مذکورہ شخص کو پولیس نے حراست میں لے لیا۔ رپورٹ میں بتایا گیا کہ مظاہرین کینیڈین وزیر اعظم جسٹن ٹروڈو کی حمایت میں نعرے لگا رہے تھے جو کہ حیران کن موڑ تھا۔
آن لائن زیر گردش ویڈیو میں ایک شخص کو بھارتی وزیر خارجہ کے قافلے کی جانب جارحانہ انداز میں دوڑتے ہوئے دکھایا گیا۔ مظاہرین کو بھارتی جھنڈے پھاڑتے ہوئے بھی دکھایا گیا جبکہ دیگر نعرے بازی کر رہے تھے۔ بعد ازاں پولیس کی جانب سے مظاہرین کو حراست میں لے لیا گیا۔
رپورٹ کے مطابق یہ واقعہ اس وقت پیش آیا جب وزیر خارجہ ایس جے شنکر 4 سے 9 مارچ تک برطانیہ کے سرکاری دورے پر تھے۔
