قومی ادارہ صحت کی جانب سے جاری کردہ تازہ ترین بیان میں انکشاف کیا گیا ہے کہ ملک میں پولیو وائرس کا ایک اور نیا کیس سامنے آ گیا ہے، جس سے رواں سال رپورٹ ہونے والے کیسز کی مجموعی تعداد 13 ہو چکی ہے۔
تفصیلات کے مطابق یہ نیا کیس صوبہ خیبرپختونخوا کے ضلع ٹانک کی یونین کونسل اماخیل سے رپورٹ ہوا ہے، جہاں ایک 18 ماہ کی کمسن بچی میں پولیو وائرس کی موجودگی کی تصدیق ہوئی ہے۔ اس افسوسناک واقعے کے بعد خیبرپختونخوا سے رپورٹ ہونے والے پولیو کیسز کی تعداد 7 ہو گئی ہے، جو ملک کے تمام صوبوں کے مقابلے میں سب سے زیادہ ہے۔
قومی ادارہ صحت کے اعداد و شمار کے مطابق رواں سال 2025 میں ملک بھر سے اب تک 13 پولیو کیسز سامنے آ چکے ہیں، جن میں خیبرپختونخوا سے 7، سندھ سے 4 جبکہ پنجاب اور گلگت بلتستان سے ایک ایک کیس شامل ہے۔
پولیو کے ان پے در پے کیسز نے ملک میں جاری انسداد پولیو مہم اور صحت عامہ سے متعلق حکومتی کوششوں پر سوالیہ نشان لگا دیا ہے۔ ماہرین صحت کا کہنا ہے کہ پولیو جیسے موذی مرض کے مکمل خاتمے کے لیے مسلسل ویکسینیشن، موثر آگاہی مہمات اور تمام علاقوں میں مساوی طبی سہولیات کی فراہمی ناگزیر ہے۔
