پاکستان کے عالمی ریکارڈ یافتہ ایتھلیٹ راشد نسیم نے ایک اور شاندار کامیابی اپنے نام کرلی ہے، جس میں انہوں نے دنیا کے تیز ترین باکسنگ پنچ مارنے والے کھلاڑی کا اعزاز حاصل کرلیا ہے۔ یہ کارنامہ انہوں نے انگلینڈ کے کھلاڑی جوشے لییالا سے ورلڈ فاسٹیسٹ باکسنگ پنچ ایکسپرٹ کا ریکارڈ چھین کر حاصل کیا۔
راشد نسیم نے ایک منٹ میں 374 پنچز کی سابقہ حد کو عبور کرتے ہوئے 386 مرتبہ مکوں سے ہدف پر ضرب لگائی۔ اس شاندار کارکردگی کو گنیز ورلڈ ریکارڈز کی جانب سے تسلیم کرلیا گیا ہے اور تصدیقی ای میل کے ساتھ ریکارڈ کو باضابطہ طور پر اپنی ویب سائٹ پر بھی جاری کردیا گیا ہے۔ راشد نے اس عالمی ریکارڈ کو فلسطین کے نام منسوب کیا، اور یہ ان کا 154 واں عالمی ریکارڈ ہے۔
راشد نسیم کو دنیا میں باکسنگ پنچ کیٹیگری میں سب سے زیادہ عالمی ریکارڈ بنانے کا اعزاز حاصل ہے۔ اس سے پہلے وہ ایک گھنٹے میں 32,686 پنچز مارنے کا ریکارڈ پاکستان کے نام کر چکے ہیں، جبکہ ایک گھنٹے میں ایک کلو وزن کے ساتھ 24,000 سے زائد پنچز بھی مکمل کرچکے ہیں۔
اب تک دنیا میں کوئی بھی ان کا یہ ریکارڈ نہیں توڑ سکا جس میں انہوں نے ایک منٹ میں ایک کلو وزن کے ساتھ 675 پنچز، تین منٹ میں 1896 پنچز اور تین منٹ میں ایک کلو وزن کے ساتھ 1778 پنچز مارے۔
حال ہی میں، راشد نسیم نے ایک ہاتھ میں انڈا پکڑ کر 207 فل ایکسٹینشن پنچز مارنے کا انوکھا کارنامہ بھی انجام دیا، جسے گنیز ورلڈ ریکارڈز نے تسلیم کیا۔ اسی طرح، ایک ہاتھ سے ایک کلو وزن کے ساتھ 163 فل ایکسٹینشن پنچز کا ریکارڈ بھی ان کے نام ہے۔
راشد نسیم نہ صرف پاکستان بلکہ دنیا بھر میں سب سے زیادہ انفرادی عالمی ریکارڈز رکھنے والے کھلاڑی بن چکے ہیں۔ پاکستان میں وہ اب تک 126 انفرادی عالمی ریکارڈز قائم کر چکے ہیں، جبکہ بھارت کے 40 سے زائد عالمی ریکارڈز بھی توڑ چکے ہیں، جو ان کی مسلسل محنت، مہارت اور عزم کا واضح ثبوت ہے۔
