سعودی عرب، قطر اور انگلینڈ کی ٹیموں نے فیفا ورلڈ کپ 2026 میں اپنی جگہ پکی کر لی ہے، جس سے ان تینوں ممالک کے شائقینِ فٹبال میں خوشی کی لہر دوڑ گئی ہے۔ یہ میگا ایونٹ آئندہ برس امریکا، کینیڈا اور میکسیکو میں مشترکہ طور پر منعقد ہونے جا رہا ہے۔
سعودی عرب نے عراق کے خلاف میچ میں بغیر کسی گول کے شاندار دفاعی کھیل کا مظاہرہ کرتے ہوئے مقابلہ ڈرا کر لیا اور مسلسل دوسری مرتبہ عالمی کپ میں رسائی حاصل کی۔ اس میچ میں سعودی ٹیم کو صرف ایک پوائنٹ درکار تھا، جو اس نتیجے کے ساتھ انہیں حاصل ہوگیا۔ گول کیپر نواف الاکیدی نے شاندار کارکردگی دکھاتے ہوئے حسن عبد الکریم کی خطرناک فری کک روک کر عراق کو ممکنہ فتح سے محروم کردیا۔
اس کامیابی کے نتیجے میں سعودی ٹیم گروپ بی میں پہلے نمبر پر پہنچ گئی۔ اگرچہ سعودی عرب اور عراق کے پوائنٹس برابر ہیں، تاہم بہتر گول اوسط کی بنیاد پر سعودی ٹیم نے پہلی پوزیشن اپنے نام کی اور براہ راست فیفا ورلڈ کپ 2026 میں رسائی حاصل کر لی۔
اب عراق کو متحدہ عرب امارات کے خلاف دو میچوں پر مشتمل پلے آف سیریز کھیلنا ہوگی، جس کے ذریعے بین الاقوامی پلے آف میں جانے والی ایشیائی ٹیم کا فیصلہ کیا جائے گا۔ اس پلے آف سیریز پر ایشیائی فٹبال مداحوں کی نظریں جمی ہوئی ہیں۔
دوسری جانب قطر نے متحدہ عرب امارات کو ایک دلچسپ مقابلے میں 1-2 سے شکست دے کر ورلڈ کپ کے لیے کوالیفائی کیا، جبکہ انگلینڈ نے لاٹویا کے خلاف 0-5 کی بڑی فتح کے ساتھ اپنی پوزیشن مزید مستحکم بناتے ہوئے ورلڈ کپ 2026 میں جگہ بنا لی۔
