لندن: برطانوی وزارت دفاع کے مطابق برطانیہ اور فرانس کی جانب سے آبنائے ہرمز کو دوبارہ کھولنے کے لیے آج لندن میں 30 سے زائد ممالک کے فوجی منصوبہ سازوں کی دو روزہ کانفرنس کا آغاز ہو گیا ہے، جس میں خطے کی سکیورٹی صورتحال پر اہم مشاورت کی جا رہی ہے۔
وزارت دفاع کے مطابق اس کانفرنس میں شریک فوجی ماہرین اپنے اپنے ممالک کی عسکری صلاحیتوں، کمانڈ اور کنٹرول کے نظام، اور خطے میں فوجی تعیناتی کے ممکنہ طریقہ کار پر تفصیلی تبادلہ خیال کریں گے تاکہ ایک مشترکہ حکمت عملی وضع کی جا سکے۔
برطانوی وزارت دفاع کا مزید کہنا ہے کہ کسی بھی ممکنہ فوجی منصوبے کو صرف اس صورت میں آگے بڑھایا جائے گا جب ایک پائیدار جنگ بندی معاہدہ طے پا جائے، تاکہ خطے میں امن اور استحکام کو یقینی بنایا جا سکے۔
