قومی ٹیسٹ ٹیم نے ٹیسٹ چیمپئن شپ 2025-27 کے اپنے ابتدائی میچ میں دفاعی چیمپئن جنوبی افریقا کو شکست دے کر 12 قیمتی پوائنٹس حاصل کر لیے ہیں، جس کے بعد اس کا جیت کا تناسب 100 فیصد پر برقرار ہے اور ٹیم نے پوائنٹس ٹیبل پر دوسری پوزیشن سنبھال لی ہے۔
موجودہ پوائنٹس ٹیبل میں صرف آسٹریلیا پاکستان سے آگے ہے، جس نے اب تک اپنے تینوں ٹیسٹ میچز میں کامیابی حاصل کرتے ہوئے 36 پوائنٹس جمع کیے ہیں۔ آسٹریلیا کا جیت کا تناسب بھی 100 فیصد ہے۔ سری لنکا دو ٹیسٹ میچز میں ایک فتح اور ایک ڈرا کے ساتھ 16 پوائنٹس اور 66.67 فیصد جیت کے تناسب سے تیسرے نمبر پر موجود ہے۔
بھارت نے اب تک سب سے زیادہ سات ٹیسٹ میچز کھیلے ہیں، جن میں چار میں کامیابی، دو میں ناکامی اور ایک میچ ڈرا کیا۔ زیادہ میچز کھیلنے کے باعث اس کے پوائنٹس 52 ہو چکے ہیں، تاہم 61.90 فیصد جیت کے تناسب کے ساتھ وہ چوتھے نمبر پر ہے۔
انگلینڈ نے پانچ میچز میں سے دو جیتے، دو ہارے اور ایک ڈرا کیا۔ سلو اوور ریٹ کے باعث انگلینڈ کے دو پوائنٹس منہا بھی کیے گئے، جس کے بعد اس کے پوائنٹس 26 اور جیت کا تناسب 43.33 فیصد رہ گیا ہے۔
بنگلہ دیش اس وقت 16.67 فیصد جیت کے تناسب کے ساتھ چھٹے نمبر پر جبکہ جنوبی افریقا ساتویں نمبر پر ہے۔ ویسٹ انڈیز کی ٹیم اب تک کھیلے گئے اپنے پانچوں میچز ہار چکی ہے اور آٹھویں نمبر پر موجود ہے، جبکہ نیوزی لینڈ نے ابھی تک اپنی مہم کا آغاز نہیں کیا۔
یہ کامیابی نہ صرف قومی ٹیم کے اعتماد میں اضافہ کرے گی بلکہ چیمپئن شپ میں مضبوط پوزیشن کے لیے ایک اہم سنگِ میل بھی ثابت ہو سکتی ہے۔
