بلوچستان کے ضلع کیچ کے علاقے بولیدہ کی پہاڑی پٹی سے اتوار کے روز 4 مسخ شدہ لاشیں برآمد ہوئیں۔ حکام کے مطابق یہ افراد تقریباً ایک ہفتہ قبل لاپتا ہوئے تھے۔
اہلِ خانہ کے مطابق مقتولین بولیدہ کے علاقے جارڈین میں تفریح کے لیے گئے تھے تاہم واپس نہیں لوٹے۔ بعدازاں مقامی رہائشیوں نے پہاڑی علاقے میں لاشوں کی اطلاع انتظامیہ کو دی، جس پر لیویز فورس موقع پر پہنچی اور لاشوں کو تحویل میں لے کر قریبی اسپتال منتقل کیا۔
لاشوں کی شناخت ذاکر، عبدالرازق، صادق اور پیر جان کے ناموں سے کی گئی ہے۔ ان میں سے تین کا تعلق بولیدہ کے علاقے زردان کوہا سے بتایا جاتا ہے جبکہ ایک مقتول جارڈین بازار کا رہائشی تھا۔
حکام کے مطابق لاشیں انتہائی مسخ شدہ حالت میں ملی ہیں جبکہ مقتولین کی موٹر سائیکلیں بھی جل کر تباہ ہو چکی تھیں۔ واقعے کے بعد ورثا لاشیں وصول کرنے کے لیے اسپتال پہنچ گئے۔
تمپ میں فائرنگ سے نوجوان جاں بحق
دوسری جانب ضلع کیچ کے علاقے تمپ میں اتوار کی شام نامعلوم مسلح افراد نے موٹرسائیکل سوار باپ اور بیٹے پر فائرنگ کی۔ حملے کے نتیجے میں بیٹا، جس کی شناخت عبدالرحمٰن کے نام سے ہوئی، موقع پر ہی جاں بحق ہوگیا جبکہ حملہ آور فائرنگ کے بعد فرار ہونے میں کامیاب ہوگئے۔
لیویز حکام کے مطابق واقعے کی وجوہات تاحال معلوم نہیں ہو سکیں، جبکہ فورس نے علاقے میں تحقیقات کا آغاز کر دیا ہے۔ اب تک کسی گروہ نے ان واقعات کی ذمہ داری قبول نہیں کی ہے۔
