چیئرمین پیپلز پارٹی بلاول بھٹو زرداری نے کہا ہے کہ وزیراعظم شہباز شریف نے ان سے 27ویں آئینی ترمیم کی حمایت کی درخواست کی ہے۔
سوشل میڈیا پر جاری بیان میں بلاول بھٹو زرداری نے بتایا کہ وزیراعظم شہباز شریف کی سربراہی میں مسلم لیگ (ن) کے وفد نے صدر آصف علی زرداری اور ان سے ملاقات کی۔ اس ملاقات میں وزیراعظم نے پیپلز پارٹی سے 27ویں آئینی ترمیم کی حمایت کی اپیل کی۔
بلاول بھٹو کے مطابق مجوزہ ترمیم میں آئینی عدالت کا قیام، ایگزیکٹو مجسٹریٹس اور ججز کے تبادلے سے متعلق شقیں شامل ہیں۔
انہوں نے مزید کہا کہ این ایف سی ایوارڈ میں صوبوں کے حصے کے تحفظ کو ختم کرنے، آرٹیکل 243 میں ترمیم، اور تعلیم و آبادی کی منصوبہ بندی کے امور کو وفاق کے دائرہ کار میں واپس لانے کی تجاویز بھی 27ویں ترمیم کا حصہ ہیں۔
بلاول بھٹو زرداری نے بتایا کہ ترمیم میں الیکشن کمیشن کی تقرری کے عمل میں ڈیڈ لاک توڑنے کا طریقہ کار بھی شامل کیا گیا ہے۔
ان کا کہنا تھا کہ صدر آصف علی زرداری کی قطر سے واپسی کے بعد پیپلز پارٹی کی سینٹرل ایگزیکٹو کمیٹی کا اجلاس 6 نومبر کو منعقد ہوگا، جس میں اس معاملے پر پارٹی کا حتمی مؤقف طے کیا جائے گا۔
